రానున్న ఎన్నికల్లో ఎంపీ, ఎమ్మెల్యే సీట్లు అమ్ముకోవడమే లక్ష్యంగా చంద్రబాబు పనిచేస్తున్నాడని వైసీపీ నేత కేశినేని నాని విమర్శించారు. నారా లోకేష్‌ ఒక పనికిమాలిన వ్యక్తి అని, అలాంటి వ్యక్తిని చంద్రబాబు మంత్రిని చేశాడని మండిపడ్డారు. విజయవాడలో గురువారం ఆయన విలేకరులతో మాట్లాడుతూ ఈ వ్యాఖ్యలు చేశారు. టీడీపీ అధినేత చంద్రబాబు ధనికుల పక్షపాతి అని ఆయన ఈ సందర్భంగా విమర్శించారు.
రైతు రుణమాఫీ, డ్వాక్రా రుణాలు మాఫీ చేస్తానని ప్రజలను మోసం చేసిన వ్యక్తి చంద్రబాబని కేశినేని నాని మండిపడ్డారు. సీఎం వైఎస్‌ జగన్ పేదల పక్షపాతి అని, ఒక్క విజయవాడ నగరంలోనే రూ.325 కోట్ల రుణమాఫీ చేశారని తెలిపారు. అంబేద్కర్‌ విగ్రహం నిర్మాణం పూర్తి చేసిన చూపించిన నాయకుడు సీఎం జగన్ అని ఆయన చెప్పారు. చంద్రబాబు మాత్రం అంబేద్కర్‌ విగ్రహ నిర్మాణం అని చెప్పి శంకుస్థాపన కూడా చేయలేదని గుర్తుచేశారు.
రాష్ట్రంలోని పిల్లలందరూ చదువుకోవాలని కాంక్షించే వ్యక్తి ముఖ్యమంత్రి జగన్ అని, చంద్రబాబు మాత్రం ధనికుల పక్షపాతి అని నాని వివరించారు. పచ్చ మీడియాను అడ్డుపెట్టుకొని వైసీపీ ప్రభుత్వంపై చంద్రబాబు నెగెటివ్‌ ప్రచారం చేస్తున్నాడని విమర్శించారు. 2014, 2019 ఎన్నికల్లో తాను ఉంటేనే తూర్పు ఎమ్మెల్యే గద్దె రామ్మోహన్‌ గెలిచాడని, తాను లేకపోతే ఎమ్మెల్యే గద్దె రామ్మోహన్‌ జీరో అని ఈ సందర్భంగా కేశినేని నాని తెలిపారు. విజయవాడ తూర్పు స్థానం నుంచి 25 వేల మెజారిటీతో అవినాష్‌ గెలవబోతున్నాడని ఆయన స్పష్టం చేశారు.