టీడీపీకి బీసీలే వెన్నెముక అంటూ తరచూ డబ్బా కట్టుకునే చంద్రబాబు.. సీట్ల కేటాయింపులో మాత్రం బీసీలతో పాటు మైనారిటీలకు వెన్నుపోటు పొడిచారు. తన సామాజిక వర్గానికే అధిక ప్రాధాన్యతనిస్తూ 94 సీట్లలో ఏకంగా 21 సీట్లు కమ్మలకే కేటాయించారు. మైనారిటీలకు కేవలం ఒకే ఒక్క సీటు ఇచ్చారు. బీసీలకు 18, ఎస్సీలు 20, కాపులకు కేవలం 7 సీట్లే ఇచ్చారు. చంద్రబాబు వ్యవహారశైలిపై ఇతర వర్గాలు మండిపడుతున్నాయి. మరోవైపు, చంద్రబాబు తీరుపై టీడీపీ యువ నేతలు సైతం ఆగ్రహం వ్యక్తం చేస్తున్నారు. ఎన్నికల్లో యువతకు 40 శాతం సీట్లు ఇస్తామని, యువ రక్తంతో పార్టీని నింపేస్తామంటూ చంద్రబాబు, లోకేష్ వేసిన క్యాసెట్టే మళ్లీ మళ్లీ వేశారు. కానీ సీట్ల కేటాయింపులో వాళ్లను పూర్తిగా పక్కన పెట్టేశారు. దీంతో యువతకు 40 శాతం సీట్లు ఎక్కడ బాబూ అంటూ ఆ పార్టీ యువ నాయకులు ప్రశ్నిస్తున్నారు.

ఇక 2014–19 మధ్య టీడీపీ అధికారంలో ఉన్న సమయంలోనూ బలహీన వర్గాలకు చంద్రబాబు ఇలానే వెన్నుపోటు పొడిచారు. ఒక్కరంటే ఒక్క బీసీని కూడా రాజ్యసభకు పంపలేదు. అగ్రవర్ణాలు.. అందులోనూ తన సామాజిక వర్గం వారినే అధికంగా రాజ్యసభకు పంపారు. న్యాయం చేయాలని విన్నవించుకున్న నాయీ బ్రాహ్మణులను తోకలు కత్తిరిస్తానన్నారు. హామీని నెరవేర్చాలని కోరిన పాపానికి తాట తీస్తానంటూ మత్స్యకారులను బెదిరించారు. ఎస్సీల్లో పుట్టాలని ఎవరైనా కోరుకుంటారా? అని వ్యాఖ్యానించి దళితులను దారుణంగా అవమానించారు. బీసీలు న్యాయమూర్తులుగా పనికిరారంటూ బాబు అవహేళన చేసిన వైనాన్ని ఆయా వర్గాలకు చెందిన వారు గుర్తు చేసుకుంటున్నారు.