జనసేన అధినేత పవన్ కళ్యాణ్ పల్లకి మోయడానికి తప్ప దేనికి పనికిరారని టీడీపీ తేల్చేసిందని మంత్రి అంబటి రాంబాబు విమర్శించారు. ఇవాళ టీడీపీ – జనసేన అభ్యర్థుల ఉమ్మడి జాబితాను ఆ పార్టీల అధినేతలు చంద్రబాబు, పవన్ కళ్యాణ్ విడుదల చేసిన సంగతి తెలిసిందే. తొలి విడతగా 94 చోట్ల పోటీ చేసే టీడీపీ అభ్యర్థుల పేర్లను చంద్రబాబు ప్రకటించారు. అదేవిధంగా పొత్తులో భాగంగా జనసేనకు 175 స్థానాలకు గాను 24 అసెంబ్లీ స్థానాలు కేటాయించినట్లు చంద్రబాబు తెలిపారు. అలాగే మూడు లోక్ సభ స్థానాల్లో జనసేన పోటీ చేస్తుందని చెప్పారు.
అయితే జనసేన 175 అసెంబ్లీ స్థానాలకు గాను కేవలం 24 స్థానాలకు సరిపెట్టుకోవడంపై కాపు నాయకుల నుంచి తీవ్ర ఆగ్రహం వ్యక్తం అవుతోంది. పొత్తులో భాగంగా జనసేనకు 40 నుంచి 50 అసెంబ్లీ స్థానాలు, కనీసం నాలుగు లోక్ సభ స్థానాలు దక్కితేనే గౌరవం ఉంటుందని, ఓట్ల బదిలీ కూడా జరుగుతుందని మాజీ మంత్రి చేగొండి హరిరామజోగయ్యతో పాటు పలువురు కాపు నాయకులు గతంలో అభిప్రాయపడ్డ సంగతి తెలిసిందే.
బయట ప్రచారం జరుగుతున్నట్లు 20, 25 స్థానాలకే జనసేన పరిమితం కాదని.. మొత్తం సీట్లలో మూడో వంతు సీట్లలో జనసేన పోటీ చేస్తుందని పవన్ కళ్యాణ్ కూడా కొద్ది రోజుల కిందట ప్రకటించారు. అయితే ఎల్లో మీడియా మొదటి నుంచి ప్రచారం చేస్తున్నట్లుగానే చంద్రబాబు జనసేనకు కేవలం 24 స్థానాలు ఇచ్చి చేతులు దులుపుకొన్నారు. జనసేన 175 సీట్లకు గాను 24 స్థానాలకే పరిమితం కావడంపై ఆ పార్టీ నాయకులు తీవ్ర అసంతృప్తి వ్యక్తం చేస్తున్నారు. కాపు సంఘాల నాయకులు కూడా చంద్రబాబు తీరుపై ఆగ్రహం వ్యక్తం చేస్తున్నారు.
పవన్ కళ్యాణ్ టీడీపీ పల్లకి మోయడానికే జనసేన పార్టీ పెట్టాడని మొదటి నుంచి విమర్శిస్తున్న వైసీపీ నాయకులు ఇప్పుడు అదే నిజమైందని అభిప్రాయపడుతున్నారు. పవన్ కళ్యాణ్ 24 స్థానాలకు సరిపెట్టుకోవడంపై మంత్రి అంబటి రాంబాబు ట్విట్టర్ వేదికగా తీవ్ర విమర్శలు చేశారు. పవన్ కళ్యాణ్ పల్లకి మోయడానికి మాత్రమే పనికొస్తారని ఘాటు వ్యాఖ్యలు చేశారు. ‘పల్లకి మోయడానికి తప్ప పావలా వంతుకు కూడా పనికి రావని తేల్చేసారు.. ఛీ’ అంటూ పవన్ ను ఉద్దేశించి అంబటి చేసిన ట్వీట్ చర్చనీయాంశంగా మారింది. పవన్ కళ్యాణ్ 24 సీట్లకే సరిపెట్టుకున్న నేపథ్యంలో ఇరు పార్టీల ఓట్లు బదిలీ అవుతాయా? అన్నది ఇప్పుడు ప్రశ్నార్థకంగా మారింది.