విజయవాడ అజిత్ సింగ్ నదర్ షాదిఖానా రోడ్ లో వీఆర్వో దురుసు ప్రవర్తన చర్చనీయాంశంగా మారింది. వరద బాధితులకోసం నిత్యావసరాలు పంపిణీ చేసేందుకు రేషన్ బండి ఆ వీధికి వచ్చింది. బండితోపాటు వీఆర్వో, ఇతర సిబ్బంది, పోలీసులు అక్కడికి వచ్చారు. స్థానికులు తమ గోడు వారికి చెప్పుకున్నారు. వరదల సమయంలో కనీసం వాటర్ బాటిల్స్ కూడా ఇవ్వలేదన్నారు. తమ కష్టాలను ఎవరూ పట్టించుకోలేదని ఆవేదన వ్యక్తం చేశారు. మహిళా వీఆర్వో ముందు వారు తమ అసంతృప్తి వ్యక్తపరిచారు. అయితే సదరు వీఆర్వో మరింత ఆగ్రహానికి గురయ్యారు. బాధితులు సెల్ ఫోన్ లో ఆ వ్యవహారం అంతా రికార్డ్ చేస్తుండే సరికి ఆమె మరింత కోపం తెచ్చుకున్నారు. సెల్ ఫోన్ తో రికార్డ్ చేస్తున్న స్థానికుడిని చెంపదెబ్బకొట్టారు. ఇదంతా కెమెరాలో రికార్డ్ అయ్యే సరికి సోషల్ మీడియాలో వైరల్ గామారింది.
https://x.com/YSRCPBrigade/status/1833098020432621873
బాధితులు ఆవేదనలో ఉంటారు, ఆగ్రహంతో ఉంటారు, వారితో జాగ్రత్తగా వ్యవహరించండి.. అంటూ సీఎం చంద్రబాబు గతంలో సూచించిన విషయం తెలిసిందే. బాధితులతో కొంతమంది అధికారులు దురుసుగా ప్రవర్తిస్తున్నారనే సమాచారం ఉందని, అలాంటి వారిని ఉపేక్షించేది లేదని హెచ్చరించారాయన. అయితే ఇప్పుడు వీఆర్వో తీరు ఇందుకు విరుద్ధంగా ఉంది. వాటర్ బాటిల్స్ ఇవ్వలేదంటూ స్థానికులు ప్రశ్నించగా ఆమె కోపంతో వారిపై దాడికి దిగారు. పోలీసుల ఎదుటే ఈ దాడి జరిగిందని స్థానికులు ఆవేదన వ్యక్తం చేస్తున్నారు.
ముంపు ప్రాంతాల్లో వరద సాయం అందరికీ అందలేదనే విషయం తెలిసిందే. అరకొర సాయంతో స్థానికులు తీవ్ర అసంతృప్తితో ఉన్నారు. తమ ఆవేదన ఎవరికి చెప్పుకోవాలో తెలియని పరిస్థితి. ఈ సందర్భంలో ఈరోజు వీఆర్వోని చూడగానే వారు తమ గోడు వెళ్లబోసుకున్నారు. తమని పట్టించుకోలేదని ఆమెను నిలదీశారు. దీంతో ఆమె కూడా ఆగ్రహంలో వారిపై చేయి చేసుకున్నారు.